Կասկածելի բեռով Ուկրաինա ուղևորվող նավը խորտակվել է․ հայտնի է՝ ինչ էր այն տեղափոխում

Կասկածելի բեռով Ուկրաինա ուղևորվող Raptor նավը խորտակվել է Հունաստանի ափերի մոտ։ Այս մասին գրում է հունական Kathimerini թերթը։

Նավում եղել է անձնակազմի 14 անդամ։ Փրկվել է մեկ նավաստի, մեկը՝ հաստատ զոհվել է, իսկ 12-ը համարվում են անհետ կորած։

«Ինչպես հայտնի է դարձել՝ նավը ներառվել է միջազգային վերահսկող մարմինների սև ցուցակում (Փարիզի փոխըմբռնման հուշագիր և Սևծովյան հուշագիր, Paris MOU & Black Sea MOU)։ Երկու տարի առաջ պարզվել էր, որ անձնակազմի անդամներին վերաբերող փաստաթղթերը թերի են եղել, իսկ վառելիքի գրքում եղել են իրարամերժ գրառումներ: Վերջին տարրը մեկնաբանվում է որպես ցուցում այն մասին, որ նավը, հնարավոր է, անօրինական, չհայտարարագրված երթուղիներով է ընթացել, այսինքն՝ կարող էր առնչություն ունենալ մաքսանենգության հետ», - գրում է պարբերականը։

Փաստաթղթերի համաձայն՝ նավը աղ էր տեղափոխում Ստամբուլ, սակայն անձնակազմի փրկված անդամն ասել է, որ իրականում վերջնակետը Ուկրաինան էր, և երբ նավը սկսել է խորտակվել, նավապետը հրաժարվել է օգնություն կանչել։

«Վերջին ապացույցները խոսում են այն մասին, որ նավը կարող էր օգտվել անօրինական, չհայտարարված երթուղիներից և ներգրավված լինել մաքսանենգության մեջ»,- գրում է թերթը։

«Դա, հավանաբար, պայմանավորված է նաև նրանով, որ անձնակազմը, հետևելով նավատիրական ընկերության ցուցումներին, շաբաթ օրը օգնություն չի խնդրել, չնայած այն հանգամանքին, որ նավում արդեն այդ ժամանակ արտահոսք է առաջացել: Դա արվեց միայն կիրակի օրը՝ նավի խորտակվելուց մի քանի րոպե առաջ»,-  ավելացնում է Kathimerini-ին:

Իր հերթին Հունական Newsit տեղեկատվական պորտալը մեջբերում է իշխանությունների կարծիքը, որոնք կարծում են, որ անձնակազմը օգնություն չի խնդրել շաբաթ օրը, չնայած առաջացած հոսքին, քանի որ «նավը, հավանաբար, անօրինական բեռ էր տեղափոխում»:

Աթենքի մակեդոնական լրատվական գործակալության տվյալներով՝ աղետի ազդանշան տվող Raptor բեռնատար նավը խորտակվել է կիրակի օրը Լեսբոսից 4,5 ծովային մղոն հարավ-արեւմուտք ընկած շրջանում՝ ուժեղ փոթորկի պայմաններում: Փրկարարական գործողությանը մասնակցել են այդ տարածքով անցնող բեռնատար նավերը, հունական նավահանգստային ծառայությունների մոտորանավակները, ինչպես նաեւ ռազմաօդային ուժերի ուղղաթիռը եւ ռազմածովային ուժերի ֆրեգատը: Ուղղաթիռից ջրի մեջ հայտնաբերվել է տակառից բռնած նավաստի։ Նրան տեղափոխել են ուղղաթիռ և տեղափոխել հիվանդանոց։ Ըստ նախնական տեղեկությունների՝ բեռնատար նավը Եգիպտոսից դուրս է եկել աղի բեռով և ուղևորվում էր Ստամբուլ: Անձնակազմի կազմում էին Սիրիայի երկու քաղաքացի, Հնդկաստանի չորս քաղաքացի և ութ եգիպտացի։