Ամենազանգվածային գործադուլը երկրի պատմության մեջ․ Չեխիայում այսօր բողոքի ակցիա է
Այսօր՝ նոյեմբերի 27-ին, Չեխիայի արհմիությունները կանցկացնեն գործադուլ, որը կընդգրկի հարյուրավոր ձեռնարկություններ և ընկերություններ, որոնցում աշխատում են գրեթե 1 մլն աշխատակիցներ, ինչպես նաև դպրոցական հաստատությունների 70%-ի անձնակազմը:
Չեխա-Մորավիայի արհմիությունների կոնֆեդերացիայի առաջնորդ Յոզեֆ Ստրշեդուլայի խոսքով՝ գործադուլի նպատակն է «ստիպել հանրապետության կառավարությանը մտածել այն մասին, թե ինչ է կատարվում հասարակության մեջ»։
«Եթե երկրի իշխանությունները կարծում են, որ նման ակցիան կարելի է անտեսել, չնկատել, ապա այս դեպքում հասարակության տրամադրությունը կարող է էլ ավելի վատանալ», - ասել է Ստրշեդուլին:
Ըստ նրա սա կլինի ամենազանգվածային գործադուլը երկրի պատմության մեջ։ Բողոքի ակցիային առաջինն աջակցել են տրանսպորտի ոլորտի աշխատակիցները։ Որոշ վարորդներ առավոտից չեն սկսել երթուղիները։
Նշենք, որ արհմիությունների հիմնական դժգոհությունն առաջացրել է նախագահ Պետեր Պավելի ստորագրած միջոցառումների փաթեթը՝ ուղղված պետական ֆինանսների առողջացմանը. այն ենթադրում է պետական սուբսիդիաների կրճատում, որոշ հարկային արտոնությունների վերացում, մի շարք ապրանքների և ծառայությունների ԱԱՀ-ի ավելացում, ինչպես նաև կենսաթոշակների վճարման ժամկետներում փոփոխություններ։ Արհմիությունների և ընդդիմության կարծիքով՝ այս փոփոխությունները կբերեն գնաճի և կնվազեցնեն քաղաքացիների կենսամակարդակը։
