ԱՄՆ-ն հայտարարել է Ուկրաինային ռազմական օգնության հերթական փաթեթի մասին

Վաշինգտոնը որոշել է Կիևին ռազմական օգնության ևս մեկ փաթեթ տրամադրել: Այս մասին երկուշաբթի հայտնել է ԱՄՆ Ազգային անվտանգության խորհրդի ներկայացուցիչ Ջոն Քիրբին։

«Կիևում ԱՄՆ պաշտպանության նախարար Լլոյդ Օսթինը հայտարարել է ռազմական օգնության նոր փաթեթի մասին», - ասել է Քիրբին Սպիտակ տանը տեղի ունեցած ճեպազրույցում:

Պենտագոնը պարզաբանում է, որ փաթեթը, ի թիվս այլ բաների, կներառի Stinger MANPADS, մեկ HIMARS համազարկային կրակի ռեակտիվ համակարգ և դրա համար նախատեսված հրթիռներ, TOW հակատանկային հրթիռային համակարգեր, Javelin հակատանկային կառավարվող հրթիռներ, AT4 հակատանկային նռնականետեր,  155 և 105 մմ հրետանային արկեր:

Քիրբին հիշեցրել է, որ Սպիտակ տունը լրացուցիչ միջոցների կարիք ունի Ուկրաինային հետագա աջակցության համար։

«Մենք կրկին ցանկանում ենք Կոնգրեսին կոչ անել՝ հաստատել լրացուցիչ ֆինանսավորման խնդրանքը, որը մենք ներկայացրել ենք, որպեսզի կարողանանք շարունակել օգնել Ուկրաինային», - ասել է նա։

Նոյեմբերի սկզբին ԱՄՆ նախագահ Ջո Բայդենը փաստաթուղթ է ստորագրել կառավարության երկփուլ ֆինանսավորման մասին, որը կկանխի կառավարության աշխատանքի դադարեցումը (փակումը)։ Օրինագիծը չի ներառում ծախսերի խորը կրճատումներ, սակայն այն նաև չի նախատեսում ֆինանսավորում Ուկրաինայի, Իսրայելի կամ Միացյալ Նահանգների հարավային սահմանի համար: