Ինչ մեկնաբանություն է տվել Գերմանիայի դեսպանատունը ԱԳ նախարարի՝ Երևան և Բաքու մեկնելուց առաջ
Նոյեմբերի 3-4-ը Գերմանիայի արտաքին գործերի նախարար Անալենա Բարբոքը կայցելի Երևան և Բաքու: Նախարարի այցերի կապակցությամբ լրացուցիչ մանրամասներ իմանալու նպատակով ադրբեջանական լրատվամիջոցները դիմել են Բաքվում գերմանական դեսպանատանը։
Նշվում է, որ սա Գերմանիայի արտգործնախարարի առաջին այցն է Հայաստան և Ադրբեջան, երկրորդը՝ Հարավային Կովկաս 2023 թվականի գարնանը Վրաստան կատարած այցից հետո։
«Գերմանիան ձգտում է կայուն խաղաղության, տարածաշրջանի քաղաքական և տնտեսական դիվերսիֆիկացման ու Եվրոպական միության հետ սերտ հարաբերությունների:
Նպատակը հանդիսանում է բանակցությունների միջոցով համապարփակ խաղաղ կարգավորումը, որ հայերը և ադրբեջանցիները կարողանան ապրել խաղաղության ու անվտանգության մեջ իրենց պետական սահմաններում»,- հայտնել են Գերմանիայի դեսպանատնից։
Դեսպանատնից նշում են․ «Այդ նպատակով աջակցում ենք եռակողմ բանակցությունների արագ վերսկսմանը Եվրամիության խորհրդի նախագահ Շառլ Միշելի միջնորդությամբ և աջակցում ենք ցանկացած հարաբերություն, որը նպաստում է Հարավային Կովկասի ժողովուրդների խաղաղությանը և կայունությանը»։
