Փաշինյանը՝ հայ–թուրքական սահմանի բացման մասին
Հայաստանի Հանրապետությունը Թուրքիայի հետ սահմանի բացման շուրջ պայմանավորվածությունների իրականացման հույս ունի։ ԱԺ–ում 2024 թվականի պետական բյուջեի նախագծի քննարկումների ժամանակ` անդրադառնալով Հայաստան–Թուրքիա հարաբերություններին, նման հայտարարություն է արել ՀՀ վարչապետ Նիկոլ Փաշինյանը։
«Ուզում եմ հույս հայտնել, որ առաջիկայում հատուկ ներկայացուցիչների քննարկումների, բանակցությունների արդյունքում ձեռք բերված պայմանավորվածությունները կիրագործվեն։ Դա վերաբերում է հետևյալին` Հայաստան–Թուրքիա սահմանն այս փուլում բացվում է երրորդ երկրների քաղաքացիների և դիվանագիտական անձնագրեր ունեցողներին»,– ասել է նա։
Փաշինյանը շեշտել է` բացի պայմանավորվածություններից, սահմանային ենթակառուցվածքների մասով զգալի աշխատանք է կատարվել` վերազինվել է Մարգարայի անցակետը։
Ավելի վաղ հայտնել էինք, որ ԱԺ մշտական հանձնաժողովների համատեղ նիստի ընթացքում ՀՀ վարչապետ Նիկոլ Փաշինյանը նաև հայտարարել է, որ Ադրբեջանի հետ հարաբերությունների կարգավորման և խաղաղության 3 հիմնական սկզբունքները համաձայնեցված են։
