ՀՀ ՆԳՆ–ն կթարմացնի ճանապարհային տեսախցիկներն ու արագաչափերը

ՀՀ ներքին գործերի նախարարությունը կզբաղվի արագաչափ տեսախցիկների ցանցի թարմացմամբ։ Այս մասին հայտնել է ՀՀ ներքին գործերի նախարար Վահե Ղազարյանն Ազգային ժողովի պաշտպանության և անվտանգության մշտական հանձնաժողովի նիստում 2024 թվականի պետական բյուջեի քննարկումների ժամանակ։

ՆԳՆ նախարարի խոսքով՝ տեսալուսանկարահանող համակարգի հարցը վերջերս քննարկել են ՀՀ փոխվարչապետ Մհեր Գրիգորյանի հետ։

«Մոտ ժամանակներս աշխատանքները կսկսենք։ Վստահեցնում եմ ձեզ, որ կունենանք բավականին ժամանակակից համակարգ։ Դա կհանգեցնի ՃՏՊ–ների զգալի նվազման։ Այսօրվա արագաչափերը 2013 թվականին էին տեղադրվել, և դրանց մաշվածությունը վերին աստիճանի է հասել, ծրագրային ապահովումները շատ դժվար են իրականացվում։ 2024 թվականից մենք նախատեսում ենք դրանով ինտենսիվ աշխատանքներ կատարել»,– նշեց Ղազարյանը։

Նախարարը շեշտեց` միջազգային փորձին ծանոթանալու համար գերատեսչության մասնագետները գործուղվել են մի շարք զարգացած երկրներ` Սինգապուր, Կորեա և Ղազախստան։