Իսրայելի պաշտպանության բանակը գիշերը թիրախային հարձակում է իրականացրել Գազայի հատվածի հյուսիսում՝ տանկերի միջոցով։ Այս մասին հայտնում է ՏԱՍՍ-ը՝ Իսրայելի պաշտպանության բանակի մամուլի ծառայության հղումով։

«Գիշերվա ընթացքում Իսրայելի պաշտպանության բանակը տանկերի միջոցով թիրախային հարձակում է իրականացրել Գազայի հատվածի հյուսիսում՝ նախապատրաստվելով մարտերի հաջորդ փուլերին: Ռազմական գործողությունների ավարտին զինվորները լքել են տարածքը», - ասվում է ռազմական գերատեսչության հայտարարության մեջ:

Իսրայելի պաշտպանության բանակը գիշերը հարվածներ է հասցրել նաև ՀԱՄԱՍ-ի զինյալներին Գազայի հատվածի հյուսիսում: Նշվում է, որ գիշերային մարտերի ընթացքում «իսրայելցի զինվորները հայտնաբերել և հարվածներ են հասցրել ահաբեկիչներին, նրանց ենթակառուցվածքին և հակատանկային հրթիռների արձակման կետերին, ինչպես նաև իրականացրել են մարտադաշտը նախապատրաստելու գործողություններ»։