Երբ կանցկացվի Ուկրաինայի հարցով հանդիպումը Թուրքիայում. հնարավոր է՝ ՌԴ–ն հրավեր չստանա
Կողմերը դիվանագիտական ուղիներով համաձայնեցնում են Թուրքիայում Ուկրաինայի հարցով հանդիպման ժամկետը, Անկարայում РИА Новости–ին հայտնել է աղբյուրը։ Ըստ ռուսական պետական գործակալության՝ նախնական տվյալներով հանդիպումը կկայանա հոկտեմբերի վերջին տասնօրյակում։ Ենթադրվում է, որ Ռուսաստանի Դաշնությունը հրավեր չի ստանա։
«Դեռ հստակ ժամկետ չկա, համակարգումը շարունակվում է։ Ըստ երևույթին, սա կլինի հոկտեմբերի վերջին տասնօրյակը»,- ասել է լրատվամիջոցի զրուցակիցը։
Ավելի վաղ Bloomberg-ը հայտնել էր, որ Թուրքիան նախաձեռնել է հանդիպում հոկտեմբերին։ Նշվում է, որ մասնակիցները կքննարկեն «Ուկրաինայում երկարաժամկետ խաղաղության հասնելու ուղիները»։ Ակնկալվում է, որ հանդիպումը կանցկացվի նույն ձևաչափով, ինչ Կոպենհագենում և Ջիդդայում տեղի ունեցած միջոցառումը, որտեղ առանց Ռուսաստանի շատ երկրների ներկայացուցիչներ քննարկեցին Վլադիմիր Զելենսկու «խաղաղության բանաձեւը»։ ՌԴ ԱԳՆ-ն Ջիդդայում կայացած հանդիպումն անվանել է «հակառուսական կոալիցիա ստեղծելու փորձ»:
