ԵՄ-ն դադարեցրել է Պաղեստինին տրվող օգնությունը Իսրայելում պատերազմի պատճառով
Ընդլայնման և հարևանության քաղաքականության հարցերով եվրահանձնակատար Օլիվեր Վարգելիջը X սոցիալական ցանցում (նախկինում՝ Twitter) հայտնել է, որ Եվրամիությունը վերանայում է Պաղեստինին տրամադրվող օգնության պորտֆելը, որը կազմում է 691 միլիոն եվրո։ Նրա խոսքով՝ 2023 թվականի բյուջեի բոլոր առաջարկները հետաձգվել են, և բոլոր վճարումները կասեցվել են: Եվրամիությունը պաղեստինյան ՀԱՄԱՍ շարժումը ճանաչում է որպես ահաբեկչական խմբավորում։
«Իսրայելի և նրա ժողովրդի դեմ ահաբեկչության և դաժանության մասշտաբները շրջադարձային են: Մենք չենք կարող սովորականի պես շարունակել գործել»,- գրել է նա սոցցանցում։
Այսօր ավելի վաղ Գերմանիայի իշխանությունները հայտարարել էին Պաղեստինին օգնություն տրամադրելու դադարեցման մասին՝ Իսրայելում ՀԱՄԱՍ-ի հարձակումների պատճառով։ Մինչ այս երկրների միջև եղել է համաձայնագիր, ըստ որի՝ 2023 և 2024 թվականներին Գերմանիան պետք է 125 միլիոն եվրոյի ընդհանուր չափով օգնություն տրամադրեր։
Հոկտեմբերի 7-ին ՀԱՄԱՍ-ը հարյուրավոր հրթիռներ է արձակել Իսրայելի ուղղությամբ։ Ի պատասխան՝ Իսրայելը ռազմական գործողություն սկսեց Գազայի հատվածում։ Իսրայելում զոհվել է ավելի քան 800 մարդ, եւս 2,5 հազարը վիրավորվել է։ Գազայի հատվածում զոհվել է 576 մարդ, վիրավորվել՝ 2,9 հազար բնակիչ։ Իսրայելին աջակցել են Եվրամիության երկրները, ԱՄՆ-ն, իսկ Իրանը և Լիբանանը աջակցել են պաղեստինցի գրոհայինների գործողություններին։
