Արցախում տեղի ունեցածի սցենարը գրվել է Ռուսաստանում՝ Էրդողանի ու Պուտինի հանդիպման ժամանակ․ Փայլան
Արցախում տեղի ունեցածի սցենարը գրվել է Ռուսաստանում՝ Թուրքիայի նախագահ Ռեջեփ Թայիփ Էրդողանի ու ՌԴ նախագահ Վլադիմիր Պուտինի՝ Սոչիում կայացած հանդիպման ժամանակ։
Այս մասին այսօր Հանրայինի եթերում ասել է Թուրքիայի խորհրդարանի հայազգի նախկին պատգամավոր Գարո Փայլանը։
Նրա խոսքով՝ Ռուսաստանն ու Պուտինը չեն ցանկանում, որ Հարավային Կովկասում ժողովրդավարական պետություն գոյություն ունենա, քանի որ այն կարող է օրինակ լինել այլ պետությունների համար, ինչը վտանգավոր է ռուսական վարչակազմի համար։
Ինչպես ընդգծել է Փայլանը, այս սցենարի վերջնական նպատակը ժողովրդավարական Հայաստանի ոչնչացումն է, և այն միութենական պետության կազմում ներառելը որպես երկրորդ Բելառուս, ուստի եթե ամբողջ աշխարհի հայերը որպես մեկ ժողովուրդ հասկանում են դա, ապա պետք է համախմբվեն Հայաստանը փրկելու գաղափարի շուրջ։
«Հիմա խնդիրը Փաշինյանը չէ, հիմա խնդիրը Հայաստանն է, ուստի պիտի միանանք և այս վտանգը միասնաբար կանխենք», - նշեց Գարո Փայլանը։
