Արմեն Աշոտյանի գործով դատական նիստը հետաձգվել է
ՀՀԿ փոխնախագահ Արմեն Աշոտյանի գործով դատական նիստը հետաձգվել է։ Համաձայն ՀՀ հակակոռուպցիոն դատարանի դատավոր Վահե Դոլմազյանի հայտարարության՝ նախնական դատալսումները հետաձգվել են՝ պայմանավորված աշխատանքային օրվա ավարտով։
Փաստաբան Տիգրան Աթանեսյանը լրագրողների հետ զրույցում ասել է, որ նիստը վատ է գնահատում, քանի որ եղել են միջնորդություններ, որոնք հերթական անգամ ապացուցում են, որ ակնհայտ ապօրինի քաղաքական հետապնդում է իրականացվում։
«Նման դեպքերում դատավորները սկսում են աղավաղել օրենքները, ասել, որ սևը սպիտակ է։ Մեղադրյալը ներկա չէր, ես հատուկ բան չասացի, իրենք նիստը մեկնարկեցին։ Սա ոչ իրավազոր նիստ էր, դատավորին դրա համար պետք է կարգապահական պատասխանատվության ենթարկեն, բայց հասկանում ենք, որ նման բան չի լինի։ Մենք սա չենք համարում դատարան, սա ամբիոն է մեզ համար հասարակության հետ երկխոսելու։ Պարոն Դոլմազյանն էլ որևէ շանս չունի ինքնուրույն ազատելուԱրմենին»,– նշել է Աթանեսյանը։
Նրա խոսքով` դատական նիստի ընթացքում դատավորը նաև օրենք է հնչեցրել, որը գոյություն չունի, ու ասել է, որ դրանով մեղադրանք կառաջադրի, բայց հետո նոր օրենքով կդատի։
Նշենք, որ հաջորդ նիստը տեղի կունենա հոկտեմբերի 11-ին, ժամը 15։00-ին։
