Իրանն աջակցում է պաղեստինցիների հարձակումներն Իսրայելի վրա

Իրանն աջակցում է «Ալ-Աքսա ջրհեղեղ» օպերացիային, որը սկսել են Իսրայելում պաղեստինյան արմատականները: Այս մասին հայտարարել է Իրանի գերագույն առաջնորդ Ալի Խամենեիի խորհրդական գեներալ Ռահիմ Սաֆավին։

Իրանական կողմն աջակցում է Պաղեստինին, Թեհրանը պաղեստինցի մարտիկների կողքին կլինի, քանի դեռ չի ազատագրվել Պաղեստինն ու նրա գլխավոր սրբավայրը՝ Երուսաղեմը։ Այս հայտարարությունն արել է Իսլամական Հանրապետության գերագույն առաջնորդի խորհրդական, գեներալ-մայոր Ռահիմ Սաֆավին։

«Մենք աջակցում ենք այդ գործողությանը (Իսրայելին ուղղված հրթիռային հարվածները. խմբ.): Իհարկե, սուրբ հողի (Պաղեստինի. խմբ.) համար պայքարողների հետ ուս ուսի կանգնած են նաև Ղասեմ Սոլեյմանիի նման մեծ նահատակները, և մենք մինչև Պաղեստինի և Երուսաղեմի ամբողջական ազատագրումը կմնանք պաղեստինցի մարտիկների կողքին», - Սաֆավիի խոսքը մեջբերում է ISNA գործակալությունը։

Հիշեցնենք` այսօր առավոտյան «Իսլամական ջիհադ» խմբավորումը հայտարարել է «Ալ Աքսայի ջրհեղեղ» գործողության մեկնարկի մասին՝ հերթական լոկալ պատերազմը սանձազերծելով Իսրայելի դեմ: Իսրայելի պաշտպանության բանակը հաստատել է, որ կորցրել է 7 շրջանի նկատմամբ վերահսկողությունը։