Իրանն ու Ադրբեջանը պայմանավորվածություն են ձեռք բերել
Իրանն ու Ադրբեջանը պայմանավորվածություններ են ձեռք բերել Նախիջևան մուտքի և ելքի հնարավորությունները բարելավելու մասին։ Այս մասին հայտարարել է Ադրբեջանի փոխվարչապետ Շահիմ Մուստաֆաևը, հաղորդում են ադրբեջանական լրատվամիջոցները։
Ըստ նրա, Ադրբեջանի կողմից օկուպացված Արցախի տարածքներում «ստեղծվում է նոր տրանսպորտային ենթակառուցվածք, ավտոմայրուղի է կառուցվում Հորադիզից Աղբանդ, վերականգնվում է երկաթուղային ենթակառուցվածքը»։ «Միաժամանակ քայլեր են ձեռնարկվում Նախիջևան մուտքի և ելքի հնարավորությունների բարելավման և բեռնափոխադրումների հեշտացման ուղղությամբ։ Այս հարցերը լուծելու համար պայմանավորվածություն է ձեռք բերվել Իրանի Իսլամական Հանրապետության հետ»,- ասել է նա։
Մուստաֆաևն ասել է, որ Նախիջևանի հետ կապը Իրանի տարածքով կիրականացվի նաև կամուրջներով, «որոնք կկառուցվեն Զանգիլանի շրջանի Աղբանդ գյուղի մոտ և Նախիջևանի տարածքում»։ Նա հավելել է, որ ձեռք է բերվել փոխադարձ պայմանավորվածություն, կամուրջի նախագիծ է պատրաստվել։
Նա հայտնել է, որ, բացի ավտոմայրուղուց, տարածքում նախատեսվում է կառուցել երկաթուղային կամուրջ։ Ամբողջական ենթակառուցվածքի ստեղծման աշխատանքները կավարտվեն մեկ տարվա ընթացքում։
