Թարմացում․ Արցախից բռնի տեղահանվել է 42 500 անձ

Ժամը 08։00–ի դրությամբ Լեռնային Ղարաբաղից բռնի տեղահանվել և ՀՀ սահմանը հատել է 42 500 անձ։ Այս մասին ասուլիսի ժամանակ հայտնել է ՀՀ վարչապետ Նիկոլ Փաշինյանի մամուլի խոսնակ Նազելի Բաղդասարյանը։

«42 500 անձանցից 22800–ը հաշվառվել են»,– ավելացրել է նա։

Բռնի տեղահանվածները կացարաններ են ստացել ՀՀ տարբեր մարզերում։

«Սյունիքում 1465 անձ է կացարան ստացել, Վայոց Ձորում` 810, Գեղարքունիքում` 976, Տավուշում` 298, Արմավիրում` 200, Արագածոտնում` 30, Շիրակում` 203 և Կոտայքում` 20»,– թվարկել է Փաշինյանի խոսնակը։

ՀՀ աշխատանքի և սոցիալական հարցերի նախարար Նարեկ Մկրտչյանն էլ իր հերթին նշեց, որ 22 800 մարդ է հաշվառվել, քանի որ մյուսներն ինքնակամ են ուղևորվել իրենց նախընտրած վայրեր։

«Մեր այն հայրենակիցները, որոնք չեն հաշվառվել և որոնց մասին մենք տեղեկություններ չունենք, շատ կարևոր է, որ դիմեն միասնական սոցիալական ծառայության տարածքային կենտրոններ և հաշվառվեն։ Դա մեզ հնարավորություն կտա հասկանալու և գնահատելու ամբողջական կարիքները, որպեսզի առավել օգտակար ծրագրեր իրականացնեք»,– ասել է նա։