Քանի տեղահանված է օգտվել պետության կողմից տրամադրված կացարաններից
ԼՂ-ից տեղահանված 42.500 անձից ընդամենը 4002-ն օգտվել է պետության կողմից տրամադրված կացարաններից: Այս մասին հայտնել է ՀՀ վարչապետի մամուլի խոսնակ Նազելի Բաղդասարյանը։
Նրա խոսքով` Կոռնիձորի կայանը հատելուց հետո քաղաքացիները հաշվառվում են Գորիսի կամ Վայքի հումանիտար կենտրոններում, որից հետո միայն տեղի է ունենում տեղաբաշխումը։
«Սա առաջնային օգնություն է, մեզ համար ներկա պահին գերնպատակ է ԼՂ-ի հայերին ապահովել որոշակի կացարանով, այնուհետև կտրամադրվեն բնակության այլ վայրեր»,- ասել է նա։
ՀՀ աշխատանքի և սոցիալական հարցերի նախարար Նարեկ Մկրտչյանն էլ ասել է, որ կարևոր է՝ ԼՂ-ից տեղահանված ու չհաշվառված քաղաքացիները միասնական սոցիալական ծառայության տարածքային կենտրոնների հետ կապ հաստատեն ու հաշվառվեն։
