Բլինկենը կրկին խոսել է Ալիևի հետ և նորից զգուշացրել

Պետքարտուղար Էնթոնի Բլինկենն Ադրբեջանի նախագահ Իլհամ Ալիևին  կոչ է արել ապահովել Լեռնային Ղարաբաղի բնակիչների անվտանգությունն ու ազատ տեղաշարժը, կատարել ռազմական գործողությունները չվերսկսելու և դիտորդական առաքելություն թույլ տալու՝ իր խոստումը, ասել է Պետդեպարտամենտի խոսնակ Մեթյու Միլլերը։ 

Նա հայտնել է, որ Բլինկենը այսօր հերթական անգամ հեռախոսազրույց է ունեցել Ադրբեջանի ղեկավարի հետ։ 


«Պետքարտուղարն այսօր կրկին զրուցել է նախագահ Ալիևի հետ և ընդգծել հետագա ռազմական գործողությունների անթույլատրելիությունը, անվտանգությունն անվերապահորեն ապահովելու, խաղաղ բնակչության տեղաշարժի ազատությունը և մարդասիրական անխոչընդոտ մուտքը Լեռնային Ղարաբաղ»,- նշել է Միլլերը։ 

Զրույցի ընթացքում Բլինկենն Ալիևին հիշեցրել է այլևս ռազմական ուժի չդիմելու և դիտորդական առաքելություն ընդունելու՝ իր խոստումների մասին։ 

«Մենք ակնկալում ենք, որ նա հավատարիմ կմնա դրան», - ասել է Միլլերը: