«Ես Ռուսաստանին վստահում եմ ոչ պակաս, քան Արևմուտքին»․ Էրդողան

Թուրքիայի նախագահ Ռեջեփ Թայիփ Էրդողանը կարծում է, որ ուկրաինական ճգնաժամը կձգձգվի։ Նա նաև նշել է, որ համագործակցում է Ռուսաստանի հետ և վստահում է նրան ոչ պակաս, քան Արևմուտքին

«Ես նրանց չվստահելու պատճառ չունեմ: Վերջին 50 տարիների ընթացքում մենք կանգնած ենք Եվրամիության շեմին, և այս պահին ես Ռուսաստանին վստահում եմ ոչ պակաս, քան Արևմուտքին»,- նշել է Էրդողանը սեպտեմբերի 18-ին PBS-ին տված հարցազրույցում։

Նա հավելել է, որ իր բնական գազի մատակարարումների կեսը գալիս է Ռուսաստանից, ինչը վկայում է իրենց համերաշխության մասին:

«Մենք համատեղ քայլեր ենք անում, համագործակցում ենք նաև պաշտպանական արդյունաբերության ոլորտում։ Այս ամենը մենք կարող ենք անել Ռուսաստանի հետ միասին»,- հավելել է Թուրքիայի նախագահը։

Նրա խոսքով, Անկարան ու ԵՄ անդամ երկրները տարբեր դիրքորոշումներ ունեն Ռուսաստանի Դաշնության նկատմամբ։

«Ռուսաստանն իմ ամենամոտ հարևաններից մեկն է, և մենք ընդհանուր պատմություն ունենք»,- նշել է Էրդողանը։

Նա կարծում է, որ Ուկրաինայում հակամարտությունը «երկար կտևի»։ Միևնույն ժամանակ, Թուրքիան հույս կունենա, որ այն «կավարտվի որքան հնարավոր է շուտ»։ Էրդողանն ընդգծել է, որ Մոսկվան «իրոք հավատարիմ է այս հակամարտության շուտափույթ ավարտի դիրքորոշմանը»: