Պեսկովը պատասխանել է Կադիրովի հիվանդության մասին լուրերի վերաբերյալ հարցին
Կրեմլը տեղեկություն չունի Չեչնիայի ղեկավար Ռամզան Կադիրովի հնարավոր հիվանդության մասին: Այս մասին հայտարարել է ՌԴ նախագահի մամուլի քարտուղար Դմիտրի Պեսկովը։
«Մենք որևէ տեղեկություն չունենք։ Համենայնդեպս, նախագահի աշխատակազմը հազիվ թե կարող է տեղեկություն տրամադրել նրա առողջական վիճակի մասին։ Հետևաբար, մենք այստեղ ասելու ոչինչ չունենք», - պատասխանել է Պեսկովը լրագրողներին այն հարցին, թե որքանով է Կրեմլը մտահոգված Կադիրովի վիճակով։
Բացի այդ, Պեսկովը մեկնաբանել է լուրերն այն մասին, թե իբր Կադիրովը կիրակի օրը մեկնել է Մոսկվա՝ հավանաբար Պուտինի հետ հանդիպելու համար:
«Պուտինի հետ հանդիպումներ չեն եղել», - պատասխանել է Պեսկովը։
Հիշեցնենք՝ ավելի վաղ, տելեգրամյան տարբեր ալիքներում և լրատվամիջոցներում չհաստատված տեղեկություն էր հայտնվել, որ Կադիրովն իբր գիշերը մահացել է Կրեմլի վարչական բաժանմունքի կենտրոնական կլինիկական հիվանդանոցում։ Մինչ այս լուրեր էին տարածվել նրա ծանր հիվանդության մասին։ Այս ֆոնին Կադիրովը կիրակի օրը հրապարակել է իր զբոսանքի տեսանյութը և խորհուրդ տվել մաքուր օդ շնչել՝ իրականությունն ասեկոսեներից տարբերելու համար։
