Բաքուն հայ բնակչությանը միասին ապրելու կոչ է անում. ադրբեջանցի պաշտոնյա

Բաքուն հայ բնակչությանը միասին ապրելու կոչ է անում։ Այս մասին հայտարարել է Ադրբեջանի պետական անվտանգության ծառայության պետ Ալի Նագիևը՝ նշելով՝ Ադրբեջանական պետությունն ու ադրբեջանցիները պատերազմ չեն ուզում։

«Մենք կոչ ենք անում հայ բնակչությանը միասին ապրելու։ Այսօր մենք մտահոգված ենք ռազմական ագրեսիայի հետևանքով ավերված բնակավայրերի շուտափույթ վերականգնմամբ և հայրենիքում տեղահանված 750 հազար բնակիչների շուտափույթ վերադարձով իրենց տներ»,- հայտարարել է Նագիևը։

Նա ասել է նաև, թե «ներկայումս որոշ հայ գաղափարախոսներ, վկայակոչելով պատմությունը, բարձրացնում են հայերի և ադրբեջանցիների համատեղ ապրելու անհնարինության հարցը», սակայն, նրա խոսքով, «հարց է առաջանում, թե ինչպե՞ս է հայ բնակչությունը, մինչև ռազմական հակամարտությունը, երկար ժամանակ ապրել Բաքվում և Ադրբեջանի այլ վայրերում, այդ թվում՝ Լեռնային Ղարաբաղում, հարմարավետ պայմաններում, որպես հարգված քաղաքացիներ և ունենալով բավարար հեղինակություն հասարակություն մեջ»: