ՆԱՍԱ-ն զեկույց է ներկայացրել չբացահայտված անոմալ երևույթների մասին
ԱՄՆ-ի օդատիեզերական գործակալությունը (ՆԱՍԱ) զեկույց է ներկայացրել անկախ փորձագիտական խմբի գործունեության մասին, որը մեկ տարի ուսումնասիրել է չբացահայտված անոմալ երևույթների տվյալները (ինչպես գործակալությունն է առաջարկում՝ ՉԹՕ-ները՝ չբացահայտված թռչող օբյեկտներ), հայտնում է ABC News-ը։ Զեկույցը հրապարակվել է ՆԱՍԱ-ի կայքում։
«Հիմնականն այն է, որ մենք դեռ շատ բան ունենք սովորելու: Անկախ հետազոտական թիմը ոչ մի ապացույց չի գտել, որ չբացահայտված անոմալ երևույթները այլմոլորակային են, բայց մենք չգիտենք, թե իրականում ինչ են դրանք», - ասել է գործակալության տնօրեն Բիլ Նելսոնը:
Ասուլիսի ընթացքում Նելսոնը հայտարարել է նաև չբացահայտված անոմալ երեւույթների ուսումնասիրման ծրագրի նոր տնօրենի նշանակման մասին։
ՆԱՍԱ-ն չի հրապարակել նոր տնօրենի անունը՝ նրան պոտենցիալ հետապնդողներից պաշտպանելու համար, քանի որ խմբի մյուս անդամներն իրենց աշխատանքի ընթացքում բախվել են թրոլինգի և նույնիսկ սպառնալիքների:
Ըստ ՆԱՍԱ-ի մամուլի հաղորդագրության՝ նոր տնօրենի պարտականությունները կներառեն տարբեր գործակալությունների և գերատեսչությունների գործունեության համակարգումը չբացահայտված անոմալ երեւույթների հետազոտման ոլորտում, ինչպես նաև արհեստական ինտելեկտի և մեքենայական ուսուցման ինտեգրում երկնքում անոմալիաներ որոնելու համար:
