Միկա Բադալյանի և Աշոտ Գևորգյանի հետ ևս 5 մարդ է ձերբակալվել. ՔԿ–ն մանրամասներ է հայտնում

Սյունիքի մարզում սեպտեմբերի 6-ին և 7-ին ձերբակալվել է թվով 7 անձ, այդ թվում Միկա Բադալյանը և Աշոտ Գևորգյանը։: Այս մասին հայտնում է ՔԿ մամուլի խոսնակ Գոռ Աբրահամյանը:

«ՀՀ քրեական օրենսգրքի 335-րդ հոդվածի 2-րդ մասի հատկանիշներով ՀՀ ԱԱԾ-ում նախաձեռնված և ՀՀ քննչական կոմիտեին փոխանցված քրեական վարույթի շրջանակներում հանցագործություն կատարելու մեջ անմիջականորեն ծագած հիմնավոր կասկածի հիմքով Սյունիքի մարզում սեպտեմբերի 6-ին և 7-ին ձերբակալվել է թվով 7 անձ, այդ թվում Միկա Բադալյանը և Աշոտ Գևորգյանը։
 

Ձևավորվել է քննչական խումբ։
 

Այս պահին կատարվում են քննչական և վարութային գործողություններ։
 

ՀՀ քննչական կոմիտեն ավելի ուշ հանդես կգա վարույթի հանգամանքներին վերաբերող հաղորդագրությամբ»,– գրել է նա։

Հիշեցնենք, որ «Ռոսսոտրուդնիչեստվո»-ի ղեկավար Եվգենի Պրիմակովը հայտնել էր, որ բլոգեր Միքայել Բադալյանն անհետացել է Հայաստանի Գորիս քաղաքում՝ Ադրբեջանի հետ սահմանի մոտ։

«Քիչ առաջ Երևանում լավ ընկերներից տեղեկացա, որ ռուսամետ բլոգեր և ակտիվիստ Միկա Բադալյանին անհայտ դիմակավորված անձինք առևանգել են Գորիսի հյուրանոցներից մեկի մոտ սեպտեմբերի 6-ի երեկոյան՝ մոտավորապես ժամը 21:00-ին: Առևանգմանը ականատես է եղել տեղի բնակիչը՝ Հայ եկեղեցու քահանա»,- գրել է Պրիմակովը թելեգրամյան իր ալիքում:

Mash թելեգրամյան ալիքը գրում է, որ ՌԴ ԱԳՆ-ն ստուգում է բլոգերի անհետացման մասին տեղեկատվությունը, իսկ գերատեսչության պաշտոնական ներկայացուցիչ Մարիա Զախարովան այս իրավիճակը սադրանք է անվանել։