Ուկրաինան շարքից դուրս է հանել Մոսկվայի նավթավերամշակման գործարանի կայանքները

Ուկրաինայի անօդաչու թռչող սարքերը հունիսի 18-ին Կապոտնյայում գտնվող Մոսկվայի նավթավերամշակման գործարանի վրա իրականացված հարձակման ընթացքում վնասել են «Euro+» նավթի վերամշակման բլոկը։ Այս մասին Reuters գործակալությանը հայտնել են աղբյուրները։

Բլոկի կազմում է ընդգրկված ԱՎՏ-6 նավթի առաջնային թորման կայանքը, որի անվանական հզորությունը կազմում է օրական 140 հազար բարել։ Դա գործարանի առաջնային վերամշակման ընդհանուր հզորության շուրջ 47%-ն է:

Վնասվել են նաև օժանդակ սարքավորումները, նավթի և նավթամթերքների պահեստավորման ռեզերվուարները, խողովակաշարերը և երկրորդային վերամշակման կայանքները։

Եվրասիական Կարնեգի կենտրոնի փորձագետ Սերգեյ Վակուլենկոն «Ագենտստվո»-ին հայտնել է, որ վնասվել է նավթի առաջնային վերամշակման հիմնական կայանքը։ Նրա խոսքով՝ դա գործարանի երկու առանցքային տարրերից մեկն է, որը մյուս կայանքների համար արտադրում է առևտրային վառելիքի արտադրության հումքը։

Գործարանում գործում են երկու ԱՎՏ կայանքներ։ Առաջինը՝ ԱՎՏ-6-ը, որն ապահովում է գործարանի հզորության 53%-ը, վնասվել էր նաև Ուկրաինայի նախորդ հարձակման ժամանակ՝ հունիսի 16-ին։

Նախորդ հարվածից հետո Մոսկվայի նավթավերամշակման գործարանը դադարեցրել էր աշխատանքը։ Reuters-ի աղբյուրների փոխանցմամբ՝ գործարանը նախատեսում էր «Euro+» կայանքի աշխատանքը վերականգնել արդեն այս շաբաթվա կեսերին և վերանորոգման ընթացքում նավթ էր վերամշակում մոտ 50% հզորությամբ՝ հունիսի 16-ին վնասված ԱՎՏ-6 կայանքի պայմաններում։