Արևային կայաններ՝ արջերի կողմից տնային տնտեսությունների վրա հարձակումները կանխելու համար
Այսօր Շրջակա միջավայրի նախարար Հակոբ Սիմիդյանն աշխատանքային այցով Վայոց ձորի մարզում է եղել` տեղում ծանոթանալու մարզի Եղեգիս համայնքի Շատին և Հերմոն բնակավայրերում մարդ-արջ կոնֆլիկտի մեղմացման և հատուցման միջոցառումների ներկայացմանը: Հայտնել է ՀՀ շրջակա միջավայրի նախարարությունը։
Նախարարը հուլիս ամսին այցելել էր վերոնշյալ բնակավայրեր, ծանոթացել արջերի հարձակումների արդյունքում բնակիչների կրած վնասներին և խոստացել հիմնավոր լուծումներին զուգահեռ, կարճ ժամանակում խնդրին միջնաժամկետ լուծում տալ:
Այսօր արդեն Շրջակա միջավայրի նախարարության «Բնապահպանական ծրագրերի իրականացման գրասենյակ» ՊՀ-ի կողմից արջերի կողմից առավեկ հաճախ հարձակումների ենթարկված տնային տնտեսություններին տրամադրվել են էլեկտրական հովիվներ, որոնք օգնում են կանխել վայրի կենդանու մուտքը այգիներ և բնակելի տարածքներ:
Վայոց ձորի մարզպետարանում կայացած հանդիպման ժամանակ նախարարը գործընկերներին է ներկայացրել խնդրի լուծման շրջակա միջավայրի նախարարության տեսլականը, այս ընթացքում իրականացված քայլերը և հույս հայտնել, որ մարզպետարանի և միջազգային գործընկերների գործուն աջակցությամբ խնդիրը վերջնական լուծում կստանա:
Նախարարը տեղեկացրել է, որ սրանով խնդրի լուծումը չի համարվում վերջնական տրված․«աշխատանքները շարունակվում են» - ասված է հաղոդրագրության մեջ։
