Հյուսիսային Կալիֆոռնիայում գրանցվել է 90 տարվա ամենաուժեղ երկրաշարժը

Չորեքշաբթի առավոտյան Հյուսիսային Կալիֆոռնիայի գյուղական հատվածում տեղի է ունեցել 5.6 մագնիտուդով երկրաշարժ, որը տարածաշրջանում վերջին 90 տարվա ընթացքում գրանցված ամենաուժեղն է եղել, հայտնում է NBC News-ը։

Սակայն ցնցումների ուժգնությունը գնահատվել է թույլից մինչև միջին, իսկ ավերածությունների կամ զոհերի մասին տեղեկություններ չեն ստացվել։

ԱՄՆ երկրաբանական ծառայության տվյալներով՝ երկրաշարժի էպիկենտրոնը գտնվել է Մենդոսինո շրջանի Ուիլիթս գյուղատնտեսական քաղաքից մոտ 11 կիլոմետր հյուսիս-արևմուտք և Սան Ֆրանցիսկոյից շուրջ 230 կիլոմետր հյուսիս-արևելք։ Էպիկենտրոնի խորությունը կազմել է մոտ 8 կիլոմետր։ Ցնցումները լայնորեն զգացվել են, այդ թվում՝ Ֆորտ Բրեգ ափամերձ քաղաքում։

Տեղի բնակիչները պատմել են, որ երկրաշարժի ընթացքում պատերը դողացել են, իսկ դարակներից ընկել են շշեր և տարբեր առարկաներ։ Կալպելլա քաղաքի ռեստորաններից մեկի այցելուները նշել են, որ ցնցումները զգացվել են այնպես, կարծես ինչ-որ բան հարվածել է շենքին։

Մասնագետների խոսքով՝ տարածքը խոշոր բեկվածքային գոտում չի գտնվում, սակայն այնտեղ պարբերաբար արձանագրվում են փոքր երկրաշարժեր։ Սեյսմոլոգ Լյուսի Ջոնսը նշել է, որ նման դեպքեր այստեղ լինում են, բայց սովորաբար ավելի ցածր ուժգնությամբ։ Նա նաև ասել է, որ հետցնցումներ հնարավոր են, սակայն, ամենայն հավանականությամբ, դրանք թույլ կլինեն։

Գլխավոր ցնցումից հետո առաջին ժամվա ընթացքում էպիկենտրոնի հարակից տարածքում գրանցվել են ևս մի քանի թույլ երկրաշարժեր՝ մինչև 2.7 մագնիտուդ ուժգնությամբ։

Արտակարգ իրավիճակների ծառայությունները որևէ վնասի կամ զոհի մասին չեն հայտնել։ MyShake վաղ նախազգուշացման համակարգի միջոցով երկրաշարժի մասին նախազգուշացումներ է ստացել ավելի քան 650,000 մարդ, իսկ իշխանությունները շարունակում են վերահսկել իրավիճակը։