Վրաստանի նախագահի պաշտոնանկության գործընթացը մեկնարկել է

Ընթացակարգային հարցերի եւ կանոնների խորհրդարանական հանձնաժողովը հաստատել է մեծամասնության պատգամավորների ստորագրությունների իսկությունը, որոնք անհրաժեշտ են Վրաստանի նախագահ Սալոմե Զուրաբիշվիլիի իմպիչմենտի ընթացակարգը սկսելու համար:

Իշխող «Վրացական երազանք՝ Ժողովրդավարական Վրաստան» կուսակցությունը հայտարարել է Զուրաբիշվիլիի իմպիչմենտի ընթացակարգի մեկնարկի մասին այն բանից հետո, երբ նա օգոստոսի 31-ին առանց կառավարության հավանության արտասահմանյան շրջագայություն է սկսել: Կուսակցությունը հայտարարել է, որ Զուրաբիշվիլին գործում է «արմատական ընդդիմության» հետ համատեղ եւ միայն խանգարում է Վրաստանի եվրաինտեգրմանը, իսկ նախագահի աշխատակազմում հայտարարել են հակառակը:

«Նախագահի իմպիչմենտի գործընթաց սկսելու մասին որոշումն ընդունվել է այն պատճառով, որ նախագահը կոպտորեն խախտում է Սահմանադրությունը»,-ասել է Ընթացակարգային հարցերի եւ կանոնների խորհրդարանական հանձնաժողովի նախագահ, «Վրացական երազանքի» պատգամավոր Իրակլի Կադագիշվիլին:

Ընդհանուր առմամբ հավաքվել են խորհրդարանական մեծամասնության 80 պատգամավորների ստորագրություններ։

Եթե Սահմանադրական դատարանը հաստատի նախագահի կողմից Սահմանադրության խախտումը, ապա 10 օրվա ընթացքում խորհրդարանը ձեռնամուխ կլինի դատարանի եզրակացության քննությանը: Այնուհետեւ 30 օրվա ընթացքում պետք է որոշում կայացվի հարցը քվեարկության դնելու մասին։