Իրանի նախագահը կայցելի Թուրքիա. Ֆիդան
Սպասվում է, որ առաջիկա օրերին Իրանի նախագահ Էբրահիմ Ռաիսին պաշտոնական այցով կմեկնի Թուրքիա, կիրակի հայտարարել է Թուրքիայի արտգործնախարար Հաքան Ֆիդանը։
«Մենք սպասում ենք, որ պարոն Ռաիսին կայցելի Թուրքիա Բարձր մակարդակի համագործակցության խորհրդի ութերորդ հանդիպման կապակցությամբ: Տա Աստված, Ռաիսին կհանդիպի մեր նախագահի հետ»,- ասել է Ֆիդանը Թեհրանում իր իրանցի գործընկեր Հուսեյն Աբդոլլահիանի հետ կայացած մամուլի ասուլիսում։
Ֆիդանը հայտնել է, որ իր գործընկերոջ հետ քննարկել է ահաբեկչության դեմ պայքարի, տնտեսական ու առևտրային համագործակցության հետ կապված մի շարք խնդիրներ։
Նրա խոսքով, բանակցությունների ընթացքում Անկարան իր կարծիքն է հայտնել Սիրիան Թուրքիայում ահաբեկչական ճանաչված Քրդստանի աշխատավորական կուսակցության զինյալներից մաքրելու հարցի վերաբերյալ։ Ֆիդանը նշել է, որ Անկարան Դամասկոսի հետ համագործակցություն է ակնկալում PKK-ի դեմ պայքարում եւ կողմ է սիրիացի փախստականների կամավոր վերադարձին իրենց հայրենիք։
