ԼՈՒՍԱՆԿԱՐՆԵՐ. Կրակոցներ Լոռու մարզում. կա վիրավոր
Լոռու մարզում այսօր կրակոցներ են հնչել, որի հետևանքով կա վիրավոր: Տեղեկությունը հայտնում է shamshyan.com–ը։
«Այսօր`ժամը 16:50-ի սահմաններում ՀՀ ՆԳՆ ոստիկանության Լոռու մարզային վարչության օպերատիվ կառավարման կենտրոն ահազանգ է ստացվել, որ Վանաձոր քաղաքի Աղայան փողոցում գտնվող սգո սրահի մոտ կրակոցներ են հնչել»,–հայտնում է կայքը։
Ոստիկաններն ու քննիչները դեպքի վայրում հայտնաբերել են տարբեր տեսակի հրազեններից կրակված 9 պարկուճ։ Այդ ընթացքում «Վանաձոր» բժշկական կենտրոնից ոստիկանություն ահազանգ է ստացվել, որ ոտքի մասում հրազենային վնասվածքներով մի քաղաքացի է տեղափոխվել իրենց մոտ:
Հիվանդանոցում իրավապահներին հայտնել են, որ վիրավորը գտնվում է վիրահատարանում և ի վիճակի չէ կատարվածի մասին բացատրություն տալ:
Դեպքի փաստով Լոռու մարզային քննչական վարչությունում նախաձեռնվել է քրեական վարույթ: Ոստիկանությունն ու քննչական բաժինը պարզում են վիրավորի ինքնությունը և ճշտումներ կատարում` արդյոք կան այլ տուժածներ։
Կայքի տեղեկություններով՝ դեպքի վայրում օգտագործվել է «Տետե», «Մակարով» տեսակի ատրճանակներ և ինքնաձիգ:
