Ակնայի ճանապարհը փակ պահելու և չօգտագործելու հստակ որոշում կա․ Դավիթ Իշխանյան
Այսօր ասուլիսի ժամանակ Արցախի ԱԺ նախագահ Դավիթ Իշխանյանը անդրադարձել է Ակնա-Ստեփանակերտ ճանապարհին ստեղծված իրավիճակին։
«Ինչ վերաբերվում է Ակնա-Ստեփանակերտ ճանապարհին, երեկվա քայլը Ադրբեջանի կողմից մեզ համար շատ անընդունելի է, և Ադրբեջանը պետք է իմանար, որ Արցախի իշխանությունների համար այդ ճանապարհի գործարկումը անընդունելի է:
Ադրբեջանը հերթական սադրիչ քայլն է անում և փորձում է ցույց տալ, որ իրենց կողմից հնարավոր բոլոր քայլերը արվում են Արցախի ժողովրդի կարիքները ապահովելու համար»,- ասել է նա:
Ըստ Իշխանյանի կա մեկ այլ նրբություն, որ Ադրբեջանը իր Կարմիր Մահիկի միջոցով փորձում է դուրս բերել Կարմիր խաչի Ստեփանակերտի գրասենյակը:
ԱԺ նախագահը նաև նշել է, որ Ակնայի (Աղդամի) ճանապարհին տեղակայված են ռուս խաղաղապահների և Արցախի ներքին գործերի նախարարության համապատասխան հսկողության կետը:
«Ես ի լուր աշխարհի ասում եմ, Աղդամի ճանապարհը փակ պահելու և չօգտագործելու հստակ որոշում կա: Մեր հասարակությունը չպետք է անվստահության միտումներ ունենա»,- ասել է նա:
