Ծանրորդ Գառնիկ Չոլակյանը՝ Եվրոպայի Մ23 տարեկանների առաջնության հաղթող
Բուխարեստում անցկացվող ծանրամարտի Եվրոպայի մինչև 23 տարեկանների առաջնությունում Հայաստանի ներկայացուցիչ Գառնիկ Չոլակյանը 61 կգ քաշային կարգում նվաճեց երկամարտի ոսկե մեդալը՝ հավաքելով 255 կգ (140+255) արդյունք։ Նա նվաճեց նաև պոկում և հրում վարժությունների փոքր ոսկե մեդալները։
Մինչև 20 տարեկանների առաջնությունում Մերուժան Եղոյանը (61 կգ) երկամարտի 254 կգ (110+144) արդյունքով դարձավ բրոնզե մեդալակիր: Հրում վարժությունում նա նվաճեց փոքր արծաթե մեդալ։
Մինչև 20 տարեկանների 55 կգ քաշային կարգում երկամարտի բրոնզե մեդալ է նվաճել Սեյրան Խուդանյանը՝ 216 կգ (95+121): Հրում վարժություն նա ևս գրավել է երրորդ տեղը։
Հիշեցնենք` Մ20 տարեկանների հավաքականի կազմում հանդես կգան նաև Տիգրան Կարապետյանը (67 կգ), Գոռ Սահակյանը, Մարտին Պողոսյանը (երկուսն էլ՝ 73 կգ), Մնացական Աբրահամյանը (81 կգ), Սուրեն Գրիգորյանը (89 կգ), Ֆելիքս Գևորգյանը (96 կգ), Գարիկ Կարապետյանը (102 կգ), պահեստայիններ են Աշոտ Մովսիսյանը և Վազգեն Գրիգորյանը (+109 կգ):
Կանանց թիմում ընդգրկված են Ալեքսանդրա Գրիգորյանը (59 կգ), Անուշ Արշակյանը (64 կգ), Ալինա Սուքիասյանը (71 կգ), Աննա Ամրոյանը (76 կգ), Էմմա Պողոսյանը (81 կգ), Մարգարիտա Առաքելյանը (87 կգ) և Ջուլիետա Ավանեսյանը (+87 կգ)։
Մ23 տարեկանների հավաքականի կազմում մրցահարթակ դուրս կգան Ռաֆիկ Հարությունյանը, Կարեն Մարգարյանը (երկուսն էլ՝ 81 կգ), Գևորգ Ղահրամանյանը (89 կգ, պահեստային), Արա Աղանյանը (96 կգ), Պետրոս Պետրոսյանը, Յաշա Մինասյանը (երկուսն էլ՝ 109 կգ), Լիանա Գյուրջյանը (87 կգ), Լուիզա Սահրադյանը, Մերի Թումասյանը (երկուսն էլ՝ +87 կգ)։
Նշենք, որ Եվրոպայի երիտասարդական առաջնությունն անցկացվում է հուլիսի 23-ից օգոստոսի 3-ը:
