Շոյգուն առաջին անգամ կայցելի Հս. Կորեա. ռազմական կապերի ամրապնդման համար

ՌԴ պաշտպանության նախարար Սերգեյ Շոյգուի գլխավորած պատվիրակությունը հուլիսի 25-27-ը կմեկնի Հյուսիսային Կորեա։ Հյուսիսային Կորեայի պաշտպանության նախարարության հրավերով պատվիրակությունը կմասնակցի «1950-1953 թվականների Հայրենական ազատագրական պատերազմում կորեացի ժողովրդի հաղթանակի» միջոցառումներին։

«Այս այցը կնպաստի ռուս-հյուսիսկորեական ռազմական կապերի ամրապնդմանը և կարևոր փուլ կդառնա երկու երկրների միջև համագործակցության զարգացման գործում»,- ասվում է ՌԴ ՊՆ մամուլի ծառայության հաղորդագրությունում։

Սերգեյ Շոյգուն նախկինում երբեք չի այցելել Հյուսիսային Կորեա։Կորեայի կենտրոնական լրատվական գործակալության մամուլի հաղորդագրությունում ասվում է, որ ռազմական պատվիրակության այցը «կարևոր քայլ կլինի երկրների ավանդական հարաբերությունների բարձրացման և զարգացման համար»։ Միջոցառմանը կայցելի նաև պատվիրակություն Չինաստանից։