Սուրովիկինի հետ միասին ավելի քան 10 բարձրաստիճան զինվորական է կալանավորվել. WSJ

Առնվազն 13 ռուս բարձրաստիճան զինվորական կալանավորվել է հարցաքննության համար «Վագներ» մասնավոր ռազմական ընկերության հիմնադիր Եվգենի Պրիգոժինի ապստամբությունից հետո, հայտնում է The Wall Street Journal-ը՝ հղում անելով աղբյուրներին: 

Ռուսաստանի Դաշնության Անվտանգության դաշնային ծառայությունը (ԱԴԾ) սկսել է ձերբակալությունները Պրիգոժինի ապստամբությունից մի քանի ժամ անց, ըստ հրատարակության զրուցակիցների։ Ձերբակալություններն արվում են «շարքերը մաքրելու» նպատակով, ասել է աղբյուրներից մեկը։ Հրատարակության տվյալներով՝ շուրջ 15 ռուս սպա արդեն հեռացվել է ծառայությունից։

ԱԴԾ-ի կողմից ձերբակալվածների թվում է Ռուսաստանի Դաշնության օդատիեզերական ուժերի հրամանատար, Ուկրաինայում ռուսական զորքերի հրամանատարի տեղակալ, բանակի գեներալ Սերգեյ Սուրովիկինը, հայտնում են WSJ-ի աղբյուրները։ Նրանց խոսքով՝ գեներալը կալանքի տակ է գտնվում Մոսկվայում, բայց ոչ քննչական մեկուսարանում, միաժամանակ բազմիցս հարցաքննվել է: 

Զրուցակիցներից մեկը հայտարարել է, որ Սուրովիկինը գիտեր ապստամբության պլանների մասին, սակայն չի մասնակցել դրան։ Սուրովիկինին մեղադրանք չի առաջադրվել։ Աղբյուրները նշում են, որ գեներալը կարող է ազատ արձակվել, հենց որ ՌԴ նախագահ Վլադիմիր Պուտինը որոշի, թե ինչպես արձագանքել ապստամբության հետևանքներին: