Իրանի դիրքորոշումը հաստատուն է, կարմիր գծերը նույնն են․ ՀՀ-ում Իրանի դեսպան
Իրանի դիրքորոշումը հաստատուն է, կարմիր գծերը նույնն են: Այս մասին հայտնել է Հայաստանում Իրանի դեսպան Աբբաս Բադախշան Զոհուրին։
Նա «Լուրերի» հետ զրույցում ընդգծել է, որ Իրանը կողմ է տարածաշրջանում ճանապարհների ապաշրջափակմանը՝ երկրների միջազգայնորեն ճանաչված սահմաններն ու տարածքային ամբողջականությունը հարգելու պայմանով:
«Իրանի Իսլամական Հանրապետությունը բազմիցս և տարբեր մակարդակներով հայտարարել է, որ կողմ է հաղորդակցության ուղիների ապաշրջափակմանը՝ տարածաշրջանի երկրների տարածքային ամբողջականության և ազգային ինքնիշխանության հարգմամբ։ Վերջին շաբաթներին Հայաստանի իշխանությունները ևս բազմիցս ընդգծել են սա։ Մենք ականատես եղանք, որ բացի Իրանից և Հայաստանից, այլ կողմեր նույնպես դեմ են արտահայտվել արտատարածքային միջանցքին։ Իրանի դիրքորոշումը հաստատուն է, պետք է հարգել երկրների տարածքային ամբողջականությունն ու ընդունել միջազգայնորեն ճանաչված սահմանները»,- ասել է նա:
