Վրաստանի նախագահը պահանջել է խստացնել վերահսկողությունը Ռուսաստանի հետ սահմանին

Վրաստանի նախագահ Սալոմե Զուրաբիշվիլին դիմել է վարչապետ Իրակլի Ղարիբաշվիլիին՝ պահանջելով անհապաղ Ազգային անվտանգության խորհրդի նիստ գումարել՝ կապված հարևան Ռուսաստանում տեղի ունեցող վերջին իրադարձությունների հետ։ 

«Ցավոք, ես պետական ​​սահմանի պաշտպանության մասին որևէ ուժային կառույցից տեղեկություն չեմ ստացել, ոչ միայն տեղեկություն չեմ ստացել, այլև անգամ ուժային կառույցների ղեկավարների հետ կապ հաստատել չեմ հասցրել, ուստի ստիպված եմ դիմել Վրաստանի վարչապետին՝ անհապաղ Ազգային անվտանգության խորհուրդ գումարելու առաջարկով»,- ասել է նա շաբաթ օրը կայացած ճեպազրույցում։ 

Նրա խոսքով՝ Ազգային անվտանգության խորհրդի նիստում անհրաժեշտ է դիտարկել Ռուսաստանի հետ սահմանին հսկողության խստացման և վիզային ռեժիմի վերանայման հարցը։ 

Այսօր ավելի վաղ Վրաստանի ՆԳՆ-ն հայտարարություն էր տարածել, որ Ռուսաստանի հետ սահմանը փակելու անհրաժեշտություն չի տեսնում։