Առաջիկայում ԱՄՆ-ում կսկսվի հայ-ադրբեջանական բանակցությունների նոր փուլ․ Վեդանտ Պատել
Առաջիկայում ԱՄՆ-ում նախատեսվում է Հայաստանի և Ադրբեջանի միջև խաղաղության հաստատման բանակցությունների նոր փուլ։ Այս մասին այսօր կայացած ճեպազրույցում հայտարարել է ԱՄՆ Պետդեպարտամենտի խոսնակ Վեդանտ Պատելը։
«Մենք անհամբեր սպասում ենք Վաշինգտոնում բանակցությունների նոր փուլին, քանի որ կողմերը շարունակում են ձգտել Հարավային Կովկասի խաղաղ ապագայի հաստատմանը: Մենք կարծում ենք, որ ուղղակի երկխոսությունը խնդիրների լուծման և խաղաղության հասնելու բանալին է»,- հունիսի 22-ի ճեպազրույցում ասել է նա։
Անդրադառնալով հայ-ադրբեջանական հարցում Մոսկվայի մասնակցությանը, Պատելն ասել է, - «Եթե Ռուսաստանը ենթադրում է, որ կարող է կառուցողական դեր խաղալ, ապա, իհարկե, կարող է դա անել։ Մենք տեսնում ենք, որ բանակցային գործընթացը շարունակական է, և Միացյալ Նահանգները կարևոր գործընկեր է դրանում, որտեղ անձամբ ներգրավված է պետքարտուղար Էնթոնի Բլինքենը»:
Պատելի խոսքով՝ հայ-ադրբեջանական նոր հանդիպումները Վաշինգտոնում «կկայանան շատ շուտով»:
