Սաուդյան Արաբիայում վստահ են, որ Մեսսին դժվար թե հրաժարվի 300 միլիոն եվրո աշխատավարձից
Սաուդյան Արաբիայում վստահ են, որ աշխարհի չեմպիոն Արգենտինայի հավաքականի և Ֆրանսիայի չեմպիոն ՊՍԺ-ի 35-ամյա հարձակվող Լիոնել Մեսսին հունիսին պայմանագիր կկնքի «Ալ Հիլյալի» հետ։ Այս մասին հաղորդում է իսպանական Marca-ն։
Սաուդյան Արաբիայում ցանկանում են տեսնել «Ալ Նասրի» 38-ամյա պորտուգալացի հարձակվող Կրիշտիանու Ռոնալդուի և Մեսսիի դիմակայությունը և մոտ են դրան։
Հայտնի է, որ «Ալ Հիլյալը» Մեսսիին կառաջարկի տարեկան 300 միլիոն եվրո աշխատավարձ, որից դժվար կլինի հրաժարվել վետերան ֆուտբոլիստին։
Նշվում է, որ սաուդյան ակումբները հետաքրքրված են եվրոպական ակումբների մի շարք խաղացողների հետ պայմանագիր կնքելու հարցում։ Մասնավորապես, հնչում են Սերխի Բուսկետսի, Ժորդի Ալբայի, Նաչո Ֆերնանդեսի, Կարիմ Բենզեմայի, Լուկա Մոդրիչի և Ալվարո Մորատայի անունները։ Սակայն առաջնային նպատակը Մեսսիին հրավիրելն է։
Հիշեցնենք՝ ՊՍԺ-ի հետ Մեսսիի պայմանագիրը կավարտվի հունիսին։ Այս մրցաշրջանում նա մասնակցել է 39 հանդիպման ակումբային մրցաշարերում, խփել 20 գոլ, կատարել 20 գոլային փոխանցում։
