ՏԵՍԱՆՅՈՒԹ․ ԱՄՆ-ում ադրբեջանցի լրագրողին բռնության են ենթարկել
Ադրբեջանական լրատվամիջոցների պնդմամբ՝ ԱՄՆ-ում հարձակման է ենթարկվել «Հարավային Ադրբեջանի հեռուստատեսության» (GünAz TV ) ղեկավար Ահմեդ Օբալին: Նա բազմաթիվ վնասվածքներով և մարմնի տարբեր հատվածների կոտրվածքներով հոսպիտալացվել է։
Ինչպես հայտնում է «Թուրան» գործակալությունը՝ ադրբեջանցի լրագրողը բռնության զոհ է դարձել Կալիֆորնիայի Սանտա Կլարա քաղաքի հյուրանոցներից մեկում՝ Ադրբեջանից Միացյալ Նահանգներ վերադառնալու հաջորդ օրը։
«Ահմեդ Օբալին ահաբեկչության է ենթարկվել Կալիֆորնիայի հյուրանոցներից մեկում՝ անհայտ թվով մարդկանց կողմից: Հարձակման արդյունքում նա լուրջ վնասվածքներ է ստացել։ Այս պահին նրա վիճակը գնահատվում է միջին ծանրության»,- ասել է GünAz TV -ի ներկայացուցիչ Արազ Օբալին։
Վերջինս «Թուրան»-ին փոխանցել է, որ ոստիկանությունը հետաքննում է կատարվածը, կան ձերբակալվածներ։
Ադրբեջանական աղբյուրների համաձայն՝ բռնության ենթարկված լրագրողը Իրանի իշխանությունների կոշտ քննադատներից է:
