Գնում ենք Սոթք` իրավիճակին ծանոթանալու. «Հայաստան» խմբակցության պատգամավոր

ԱԺ «Հայաստան» խմբակցության պատգամավորները ադրբեջանական կրակոցների հետեւանքով առաջացած իրավիճակին ծանոթանալու համար գնում են Գեղարքունիքի մարզի Սոթք գյուղ: Այս մասին Auroranews-ի հետ զրույցում ասաց «Հայաստան» խմբակցության պատգամավոր Քրիստինե Վարդանյանը:

«Գնում ենք, որպեսզի տեղում ծանոթանանք իրավիճակին, նաև մեր աչքերով տեսնենք` ինչ է կատարվում, զրուցենք մեր քաղաքացիների հետ և հասկանանք, թե նրանք այս պահին ինչ կարիքներ ունեն»,- մեզ հետ զրույցում ասաց պատգամավորը:

Գեղարքունիքի մարզի Սոթք գյուղ են գնում ԱԺ «Հայաստան» խմբակցության պատգամավորներ Քրիստինե Վարդանյանը, Իշխան Սաղաթելյանը, Ասպրամ Կլպեյանը, Արման Ղազարյանը, Գառնիկ Դանիելյանը և Արգիշտի Գևորգյանը:

Հիշեցնենք` այսօր առավոտյան Ադրբեջանի ԶՈւ-ն կրակ է բացել Սոթքի հատվածում հայկական դիրքերի ուղղությամբ: Ադրբեջանական սադրանքի հետևանքով հայկական կողմից վիրավորում է ստացել 4 զինծառայողներ, որոնց կյանքին վտանգ չի սպառնում: