Պատժամիջոցներ չինական այն ընկերությունների նկատմամբ, որոնք առևտուր են անում ՌԴ-ի հետ. ԵՄ առաջարկը
Եվրամիությունը առաջարկել է պատժամիջոցներ կիրառել չինական ընկերությունների նկատմամբ, որոնք Ռուսաստանին սպառազինության մեջ օգտագործվող սարքավորումներ են մատակարարում։ Այդ մասին գրում է «Financial Times»-ը, որը ստացել է Եվրահանձնաժողովի կողմից պատրաստված պատժամիջոցների ցուցակի նախագիծը։
Սահմանափակիչ միջոցների նոր փաթեթում, որը կքննարկեն ԵՄ անդամ երկրներն առաջիկա օրերին, թվարկված են 7 ընկերություն Չինաստանից, որոնցից մի քանիսն արդեն հայտնվել են ԱՄՆ պատժամիջոցների տակ։ Այդ ընկերությունները արտադրում են կիսահաղորդիչներ, միկրոչիպեր և այլ էլեկտրոնային արտադրանքներ։
Դրանցից են չինական երկու ընկերություններ՝ 3HC Semiconductors և King-Pai Technology, ինչպես նաև հինգ հոնկոնգյան ընկերություններ, այդ թվում՝ Sinno Electronics, Sigma Technology, Asia Pacific Links, Tordan Industry և Alpha Trading Investments։
