Եթե մյուս տարբերակները չեն աշխատում, ադրբեջանցիներին պետք է ուժով հետ շպրտել. ԳՇ պետի նախկին տեղակալ
Մայիսի 8-ին լրագրողների հետ զրույցում ՀՀ ԶՈւ ԳՇ պետի նախկին տեղակալ Տիրան Խաչատրյանը անդրադարձել է Սյունիքի մարզի Տեղ համայնքում տեղի ունեցած միջադեպին:
«Կամայական կարգի հրամանատար՝ սկսած ջոկի հրամանատարից, հասկանում է, որ իր ենթակային խնդիր կարող է առաջադրել այն տրամաբանության մեջ, որն ի զորու լինեն կատարել: Եթե խնդիր առաջադրված է եղել ու ի զորու չեն եղել կատարել, դա խնդիրը առաջադրողի պրոբլեմն է: Եթե խնդիր առաջադրված չի եղել, այդ դեպքում ով էր խնդիր առաջադրողը եւ ինչու չի առաջադրել, որտեղից էր սկսում այդ չառաջադրելու թելը: Ես չգիտեմ՝ խնդիր չի՞ առաջադրվել, թե՞ առաջադրվել է ու չեն կատարել», - ասել է նա:
Ըստ Տիրան Խաչատրյանի՝ լուծման տարբերակներց մեկն էլ ադրբեջանցիներին ուժով շպրտելն է.
«Իհարկե, կան քաղաքական, դիվանագիտական մոտեցումներ, որոնց կիրառումը պարտադիր պահանջ է ու երբևէ որևէ մեկն, առավել ևս զինվորական, միանգամից չի գնում այն քայլին, որը կտանի բախման, էլ չեմ ասում՝ լայնամասշտաբ պատերազմի: Բայց եթե քաղաքական ու դիվանագիտական տարբերակները չեն աշխատում ու կա խնդիր, որ սա մեր տարածքն է ու մեզ վստահված պատասխանատվության տեղամասը, որի համար ես կյանքով պատասխանատվությում եմ կրում, պետք գնալ դրան»,- նշել է Խաչատրյանը:
