Եթե ինչ–որ մարդիկ գումար են բաժանել, ես դրա հետ ի՞նչ կապ ունեմ. Ծառուկյան

ԲՀԿ առաջնորդ Գագիկ Ծառուկյանը պնդում է` եթե ընտրակաշառք բաժանելու գործով մեղավոր լիներ, կընդուներ մեղքը։ ԲՀԿ առաջնորդն այս մասին լրագրողների հետ խոսեց Հակակոռուպցիոն դատարանի մոտ։

«Եթե ես մեղավոր լինեի, վաղեմության ժամկետը վաղուց անցել է, կհամաձայնեի, վաղեմության ժամկետի անցած լինելու հիմքով գործը կկարճվեր»,– լրագրողների հետ ճեպազրույցում նշեց ԲՀԿ առաջնորդը։

Ըստ Ծառուկյանի` եթե ինչ–որ գյուղերում ինչ–որ մարդիկ գումար են բաժանել, ապա ինքը ի՞նչ կապ ունի դրա հետ` շեշտելով, որ մեղքը չի ընդունում։

Հիշեցնենք, որ Հակակոռուպցիոն դատարանում մեկնարկել է «Բարգավաճ Հայաստան» կուսակցության նախագահ Գագիկ Ծառուկյանի և «Մուլտի գրուպ» կոնցեռնի տնօրեն Սեդրակ Առուստամյանի գործով քննությունը։ Նրանք մեղադրվում են 2017թ․ խորհրդարանական ընտրություններում ընտրողներին կաշառք տալու մեջ։