Չեխիան համակարծիք է Եվրամիության հետ Լաչինի միջանցքի հարցում. Պետեր Ֆիալա
Հայաստանի և Չեխիայի վարչապետների միջև անցկացված բանակցություններն ամփոփող մամուլի ասուլիսի ժամանակ Չեխիայի կառավարության ղեկավարը` Պետեր Ֆիալան, նշել է, որ Չեխիան անուշադրության չի մատնում բոլոր այն խնդիրներն ու մարտահրավերները, որոնք Հայաստանի առջև ծառացած են։
«Տեղյակ ենք բարդ իրավիճակի մասին` քաղաքական, անվտանգային, աշխարհագրական։ Մենք մտահոգված ենք Լեռնային Ղարաբաղում մարդասիրական իրավիճակով, որի պատճառը Լաչինի միջանցքի շրջափակումն է»,– ասել է վարչապետ Ֆիալան։
Ըստ նրա` Չեխիան այս հարցում համակարծիք է Եվրամիության հետ։ Հավատացած են` պետք է հնարավոր բոլոր քայլերը ձեռնարկել, որպեսզի խաղաղություն և կայունություն հաստատվի Լեռնային Ղարաբաղում և ամբողջ կովկասյան տարածաշրջանում։
«Ինչ վերաբերում է տարածքային ամբողջականությանը և Հայաստանի ու Ադրբեջանի միջև քննարկումներին, ապա մենք կարևորում ենք խաղաղության պայմանագրի կնքումը, որն ընդունելի կլինի բոլոր կողմերի համար»,– շեշտել է Չեխիայի վարչապետը։
Ավելի վաղ տեղեկացրել էինք, որ ՀՀ վարչապետ Նիկոլ Փաշինյանը տիկնոջ՝ Աննա Հակոբյանի հետ երկօրյա պաշտոնական այցով ժամանել է Չեխիայի Հանրապետություն։
