Մեր համբերությունն էլ չափ ու սահման ունի. Իրանից` Ադրբեջանին

«Իրանը մեծ երկիր է, որը պատմության ընթացքում հատուկ հարգանք է տածել իր հարևանների նկատմամբ: Իրանն իր հյուսիսարևմտյան հարևանների, հատկապես Ադրբեջանի հետ շատ ընդհանրություններ ունի, և մենք միշտ հարգել ենք այս երկիրը»: Այս մասին հայտարարել է Իրանի խորհրդարանի փոխնախագահ Ալի Նիքզադը՝ խոսելով Իրան-Ադրբեջան հարաբերությունների մասին՝ հավելելով՝ Ադրբեջանը պետք է իմանա, որ Իսլամական հեղափոխությունից հետո Իրանի հարևաններից մեկը ( Իրաքը) մի անգամ սխալվեց, և չնայած տարբեր երկրների մեծ աջակցությանը՝ 8 տարվա ընթացքում չկարողացավ Իրանի դեմ կանգնել, այդ իսկ պատճառով Ադրբեջանի պետական այրերին խորհուրդ ենք տալիս պահել և հարգել բարիդրացիականության սկզբունքը: 

Նիքզադն, անդրադառնալով Ադրբեջանի դեսպանատան վրա հարձակմանը, ասել է, որ այն անձնական դրդապատճառներով է եղել և հավելել՝ եթե մի անգետ մարդ մի սխալ է արել, պետք է փակե՞լ դեսպանատունը կամ հանե՞լ դիվանագետներին և այլ բաներ խոսել:

«Այդ դեպքից հետո մեր նախագահը կապ է հաստատել Ադրբեջանի նախագահի հետ, խորհրդարանի նախագահն էլ է ուղերձ հղել և ափսոսանք հայտնել, ես ինքս Թեհրանում Բաքվի դեսպանատան երկրորդ անձի հետ եմ զրուցել: Իրանը մինչ այժմ իրեն պատվով է պահել, ուստի խորհուրդ եմ տալիս Ադրբեջանի կառավարությանն ու խորհրդարանին անդրադառնալ պատմությանը և ճիշտ վարքագիծ դրսևորել: Վերջին օրերին Ադրբեջանը 4 դիվանագետի է արտաքսել, և, անշուշտ, մեր ԱԳՆ-ն էլ փոխադարձ գործողություն կձեռնարկի, բայց այս վարքագիծը լավ ավարտ չունի»,- նշել է նա:

Նիքզադն ընդգծել է, որ Իրանը առանձնահատուկ հարգանք է տածում Ադրբեջանի ժողովրդի նկատմամբ և որպես իրանցի մուսուլման, պատգամավոր՝ ընդգծել, որ Իրանի և Ադրբեջանի ժողովուրդները շատ ընդհանրություններ ունեն, բայց Ադրբեջանը պետք է ձեռք քաշի արկածախնդրություններից:

«Իրանը մինչև հիմա համբերատար է եղել, բայց համբերությունն էլ չափ ու սահման ունի: Մենք ոչ մի հակասություն չունենք, երկու երկրների սահմանները, իշխանությունները, տեսակետները հստակ են, երկրներից յուրաքանչյուրն անկախություն ունի, բայց ադրբեջանցիները պետք է պատմությունը չմոռանան: Եթե Ադրբեջանում սիոնիստական (Իսրայելի բնորոշումն Իրանում - խմբ.) խումբ էլ տեղակայվի, նրանք չեն կարող ոչինչ անել: Մեր սիրտը ցավում է Ադրբեջանի ժողովրդի համար: Մենք պետք է զարգացնենք մեր հարաբերությունները խաղաղ պայմաններում՝ պահպանելով արժանապատվությունն ու բարեկամությունը, բայց Իրանի համբերությունն էլ սահման ունի»,- ասել է նա: