Հայաստանը երբեք չի մերժել ՀԱՊԿ դիտորդական առաքելությանը լինել Հայաստանում. Խանդանյան

Հայաստանը երբեք չի մերժել ՀԱՊԿ դիտորդական առաքելությանը լինել Հայաստանում։ Այս մասին լրագրողների հետ զրույցում ասել է ԱԺ արտաքին հարաբերությունների հանձնաժողովի նախագահ Սարգիս Խանդանյանը։

Նա ընդգծել է,  որ այն փաստաթուղթը, որի հիման վրա պետք է նման առաքելությունը լիներ, լրամշակման փուլում է։

«Մեզ համար կարևոր է, որ կատարվեն այն արձանագրումները, որոնք պետք է օբյեկտիվորեն ներկայացնեն իրականությունը, թե ինչ է տեղի ունեցել ՀՀ ինքնիշխան տարածքի նկատմամբ»,- նշել է նա։

Սարգիս Խանդանյանը մանրամասնեց, որ ՀԱՊԿ առաքելության տեղակայման մասին հնարավոր կլինի խոսել այն փուլում, երբ Հայաստանը կգտնի, որ այնպիսի նախագիծ է ներկայացվել, որը բավարարում է պաշտոնական Երևանի դիրքորոշումներին ու ցանկություններին։

Պատգամավորի խոսքով՝ առանց իրավիճակը մանրամասն գնահատելու դժվար կլինի պատկերացնել, թե ինչպիսի առաքելություն ՀԱՊԿ-ն պետք է իրականացնի։