ՏԵՍԱՆՅՈՒԹ․ «Բաքվի նոր առաջարկները ստացել ենք․ թևակոխում ենք խաղաղության պայմանագրի նախագծի քննարկման 4–րդ փուլ»․ Փաշինյան

Հայաստանի Հանրապետությունը Ադրբեջանից ստացել է խաղաղության պայմանագրի վերաբերյալ նոր առաջարկներ: Այսպիսով թևակոխել ենք պայմանագրի նախագծի քննարկման 4-րդ շրջափուլ։ Այս մասին կառավարության նիստի ժամանակ ասաց ՀՀ վարչապետ Նիկոլ Փաշինյանը։

«Մենք կքննարկենք և առաջիկայում կներկայացնենք մեր դիտարկումները։ Հավատարիմ ենք ու չենք շեղվելու խաղաղության օրակարգից»,– ընդգծեց վարչապետը։

Միևնույն ժամանակ, նա միջազգային հանրության ուշադրությունը հրավիրեց այն փաստի վրա, որ ի հեճուկս 2020 թվականի նոյեմբերի 9-ի եռակողմ հայտարարության 8-րդ կետի` մինչև հիմա Ադրբեջանը չի վերադարձրել հայ գերիներին, պատանդներին և այլ պահվող անձանց։ Նա նաև հիշեցրեց, որ Ադրբեջանը շարունակում է օկուպացիայի տակ պահել 1994, 2021, 2022 թթ. ագրեսիայի հետևանքով Հայաստանի Հանրապետությունից բռնազավթած ինքնիշխան տարածքները։