Իրանի ԱԳՆ-ն` ռազմական ինքնաթիռի` ադրբեջանա-իրանական պետական սահմանի երկայնքով թռիչքի մասին

Իրանի ԱԳՆ պաշտոնական ներկայացուցիչ Նասեր Քանանին մամուլի ասուլիսի ժամանակ մեկնաբանել է Ադրբեջանում Իրանի դեսպանի հրավերը ԱԳՆ:

Նա նշել է, որ դեսպանի հրավերը ԱԳՆ կապված էր Իրանի տարածքում ինքնաթիռի թռիչքի հետ։

«Դա կանոնավոր չվերթ էր, որն իրականացվում է Իրանի սահմանամերձ շրջաններում և Իրանի տարածքում մոնիթորինգի շրջանակներում։ Նման չվերթներ նախկինում արդեն իրականացվել են։ Թռիչքն իրականացվել է Ադրբեջանի սահմանից բավականաչափ հեռավորության վրա ՝ Իրանի օդային տարածքում, և սովորաբար այն իրավիճակներում, երբ տեխնիկական սխալ է տեղի ունենում, ռադարներն ու պաշտպանական ցանցերը տալիս են անհրաժեշտ նախազգուշացումներ: Այդ թռիչքի հետ կապված Իրանին ռադիոլոկացիոն նախազգուշացումներ չեն ստացվել, ինչը նշանակում է, որ սխալ չի եղել», - ընդգծել է Քանանին։

Նա հավելել է, որ Իրանը հարաբերություններ ունի Ադրբեջանի հետ պաշտպանության ոլորտում, դեսպանատունը գործում է, կա պաշտպանության նախարարության կցորդ, եթե Բաքուն բարի կամք ունենար այդ առումով, ապա հարցը հնարավոր կլիներ լուծել երկրի դեսպանատան հետ ՊՆ կցորդի ներկայությամբ, և թյուրիմացությունը կարող էր լուծվել այդ շրջանակներում:

«Մենք հարեւաններ ենք Ադրբեջանի հետ եւ մենք միմյանց պատմական թեւերն ենք, եւ մենք ակնկալում ենք ազնիվ համագործակցություն եւ նման մասնագիտացված թեմաների քննարկում եւ լուծում մասնագիտացված շրջանակներում։ Մենք բազմիցս ընդգծել եւ եւս մեկ անգամ ընդգծում ենք, որ վիճահարույց թեմաների քննարկումը լրատվամիջոցներում չի նպաստի խնդրի լուծմանը եւ բարի կամքի դրսեւորում չէ»,-հայտարարել է Քանանին։