«Որոշակի պարբերականությամբ կրակահերթեր հնչում են». Աբրահամյան
Արցախի ԱԳՆ-ն բավականին կոշտ գնահատական է հնչեցրել Ադրբեջանի իրականացրած գործողության վերաբերյալ` այն համարելով որպես պատերազմական: Այս մասին ֆեյսբուքյան իր էջում գրում է ԱԺ «Պատիվ ունեմ» խմբակցության պատգամավոր Տիգրան Աբրահամյանը:
«Ի դեպ, մարտի 1-ին, ադրբեջանական ու արցախյան պատվիրակությունների հանդիպումից հետո Արցախի նախագահականը շտապել էր հայտարարելու, որ «հանդիպումն առերևույթ կառուցողական էր»` անիմաստ պարզաջրելով Ադրբեջանի վարքագիծը:
Ինչևէ, Ադրբեջանի ագրեսիան դրսևորվեց ոչ միայն շփման գծում, այլ դիվանագիտական ձևակերպումներում, որովհետև այս ագրեսիայի հետ կապված հայտարարությամբ, Ադրբեջանի ԱԳՆ-ն շինծու, կեղծ որակումների ներքո առաջ քաշեց ՀՀ-ն Արցախին կապող միջանցքում ադրբեջանական անցակետերի տեղակայման թեման:
Թեև այս պահին շփման գծում լուրջ փոխհրաձգության մասին լուրեր չկան, սակայն որոշակի պարբերականությամբ կրակահերթեր հնչում են»,-նշում է Աբրահամյանը:
Հիշեցնենք` Մարտի 5-ին՝ ժամը 10։00-ի սահմաններում, ադրբեջանական զինուժի դիվերսիոն խումբը թիրախավորել և կրակ է արձակել ոստիկանության անձնագրային և վիզաների վարչության անձնակազմի հերթափոխի մեքենայի վրա։
