Զոհված զինվորի հարազատները փակել են Գյումրի-Երևան ճանապարհը. ինչ են պահանջում
Նախորդ տարվա հուլիսին հրդեհից մահացած զինծառայող Պալյան Պողոսյանի հարազատները փակել են Գյումրի-Երեւան ավտոճանապարհը:
News.am-ին զինծառայողի հայրը՝ Ջիվան Պողոսյանը, ասաց, որ իրենք պահանջում են հանդիպում Պաշտպանության նախարար Սուրեն Պապիկյանի հետ:
Նշենք, որ 6 ամիս առաջ Սյունիքի մարտական դիրքի վագոն-տնակում հրդեհը խլել էր նրանց 19-ամյա որդու՝ Պալյանի կյանքը։ Պալյանը այրվածքներ էր ստացել դիրքերում զինվորների հանգստի համար նախատեսված վագոն-տնակում տեղադրված վառարանից բռնկված հրդեհից։ Պալյանը 10 օր հիվանդանոցում է եղել, վերջին օրը գիտակցության չգալով, մահացել է:
Պալյան Պողոսյանի մահվան դեպքով նախաձեռնված քրեական գործով մինչեւ օրս մեղադրյալ չկա, նույնիսկ դատաբժշկական փորձաքննության արդյունքները մինչեւ հիմա հայտնի չեն: Ծնողները դժգոհ են նախաքննության ընթացքից եւ պահանջում են պատկան մարմիններին հստակ ներկայացնել, թե ինչ փուլում է քրեական գործը: Նրանք պահանջում են, որ պաշտպանության նախարար Սուրեն Պապիկյանը ժամանի և պատասխան տա:
