Էրդողան. Խաղաղության գործընթացին սպառնացող փորձերը ձախողվել են

Թուրքիայի նախագահ Թայիփ Էրդողանը, մեկնաբանելով ԱՄՆ-ի և Իրանի միջև ձեռք բերված համաձայնությունը, հայտարարել է, որ տարածաշրջանը, որը մի քանի ամիս շարունակ գտնվել էր լարված իրավիճակում, վերջապես «թեթև շունչ է քաշել»։

Թուրքիայի նախագահը նշել է, որ թուրքերի, արաբների, քրդերի և պարսիկների միջև նոր տարաձայնությունների օջախներ հրահրելու փորձերը ձախողվել են։

Էրդողանը նաև հայտարարել է, որ Իսրայելի պաշտոնյաների՝ երեկ և այսօր հնչեցրած հայտարարությունները վկայում են Մերձավոր Արևելքում խաղաղության գործընթացը տապալելու Իսրայելի մտադրության մասին։

Թուրքիայի նախագահն ընդգծել է, որ այս պայմաններում անհրաժեշտ է զերծ մնալ ցանկացած հռետորաբանությունից և գործողություններից, որոնք կարող են սրել լարվածությունը, ինչպես նաև պահպանել բարձր զգոնություն հնարավոր սադրանքների և դիվերսիոն գործողությունների նկատմամբ։