Իրանը «հաղթող է դուրս եկել», համաձայնագիրը «պատվի փաստաթուղթ է». Փեզեշքիան

Իրանի նախագահ Փեզեշքիանը հայտարարություն է արել ԱՄՆ-ի հետ ստորագրված համաձայնագրի մասին.

«Ամիսներ տևած բանակցությունների և այս ուղղությամբ իրականացված անընդհատ ջանքերի արդյունքում մշակված այս համաձայնագիրը, եթե դրա բոլոր դրույթները պատշաճ կերպով իրականացվեն, կարող է դառնալ մի փաստաթուղթ, որով երկիրն իրավամբ կարող է հպարտանալ։

Անհրաժեշտ եմ համարում շնորհակալություն հայտնել իմ եղբայրներին և բոլոր նրանց, ովքեր դերակատարում են ունեցել այս ճանապարհին»,– նշել է նա:

Նա նաև հայտարարել է, որ Թեհրանը ամերիկա-իրանական հուշագրի շուրջ ստեղծված իրավիճակից «հաղթող» է դուրս եկել։ Ելույթ ունենալով ազգային համաժողովում՝ նա ձեռք բերված պայմանավորվածությունները բնութագրել է որպես «պատվի փաստաթուղթ» Իրանի և տարածաշրջանում «դիմադրության» ուժերի համար։

Նրա խոսքով՝ համաձայնագրի տեքստում կան «չնչին տարաձայնություններ մի շատ կարճ բաժնում», սակայն նա չի հստակեցրել մանրամասները։ Մեկնաբանելով Իսրայելի արձագանքը՝ Փեզեշքիանը նշել է, որ այն հաստատում է Իրանի «հաղթանակի» մասին դիրքորոշումը։