Ուկրաինան ևս մեկ քայլով մոտեցավ ԵՄ-ին․ մեկնարկել են անդամակցության բանակցությունները

Եվրոպական միությունն ու Ուկրաինան պաշտոնապես սկսել են անդամակցության շուրջ բանակցությունները՝ Լյուքսեմբուրգում կայացած միջկառավարական կոնֆերանսի ընթացքում։ Այս մասին X սոցիալական ցանցում հայտնել է Եվրոպական խորհրդի նախագահ Անտոնիու Կոշտան։

Եվրահանձնաժողովի մամուլի ծառայության հաղորդմամբ՝ համապատասխան որոշումն ընդունվել է ԵՄ անդամ բոլոր երկրների կողմից։

«ԵՄ բոլոր երկրները համաձայնել են սկսել Ուկրաինայի և Մոլդովայի անդամակցության բանակցությունների առաջին փուլը։ Մենք տեսնում ենք, թե որքան մեծ աշխատանք են կատարել այս երկրները, և գնահատում ենք նրանց ջանքերը»,- նշվում է հայտարարության մեջ։

Բացման արարողությունը տեղի է ունեցել Լյուքսեմբուրգում՝ ԵՄ անդամ երկրների արտաքին գործերի նախարարների հանդիպման շրջանակում։

Դրանից երկու օր առաջ՝ հունիսի 13-ին, Հունգարիան հանել էր Ուկրաինայի հետ բանակցությունների մեկնարկի նկատմամբ իր վետոն։ Հունգարիայի վարչապետ Պետեր Մադյարը նշել է, որ բանակցային փուլի բացումը «միայն առաջին քայլն է» այն գործընթացում, որը կարող է տևել մի քանի տարի։

Որպես օրինակ նա նշել է Չեռնոգորիան, որը ԵՄ-ին միանալու շուրջ բանակցությունները սկսել է դեռ 2012 թվականին, սակայն մինչ օրս չի ավարտել դրանք։